Euskalmetek iragarria zuen alerta laranja kostaldean, itsasoa zakar eta haizea indar handiarekin ibiliko zela abisatuz. Eta halaxe izan zen, atal honetarako argazki bila ateratzea aitzakia hartuta, hantxe joan nintzen kamerarekin itsasgora zen orduan.
Itsasoa eta haizea zakar egon arren zerua eguzkitsu zegoen, eta horrek argazkiak ateratzeko lana atseginagoa izaten laguntzen zuen.
Hala ere, nire espektatibak bestelakoak ziren, uste nuen olatu erraldoiagoak egongo zirela, bestaldeko barra zeharkatzen duten horietakoak, baina ez zen horrelakorik pasatu. Eduki azkar eta txundigarrietara ohitu gaitu algoritmoak eta irudi horiek buruan nituela atera nintzen ni ere. Natura, ordea, ez dabil logika horren baitan. Eta horrela topatu nuen itsasoa, zakar eta indartsu bai, baina ez buruan nuen moduan. Gauza bat nahia baita, eta bestea, dagoena.