Donibane Lohizunen (Lapurdi) jokatu zuten atzo Gipuzkoako batel ligako zazpigarren jardunaldia. 15:30etik aurrera aritu ziren ontziak lehian, eta Orioko Arraunketa Elkarteko taldeek lan ona egin zuten, bereziki infantil mailako mutilek: lehenengo sailkatu zen Orio A taldea, eta bigarren Orio B.
Infantil neskatan, berriz, bederatzigarren egin zuten oriotarrek. Promesa mutiletan garaipena lortu zuen Orio A-k eta seigarren egin zuen B batelak. Promesa neskatan, aldiz, bederatzigarrena izan zen Orioren A ontzia, hamabigarrena Orio C eta hamalaugarrena Orio B.
Traineruetan, beteranoak aurretik
OAEko beteranoek eta gizonezkoek Hondarribian (Gipuzkoa) izan dute asteburu honetako hitzordua: Hondarribiako XXVI. Traineru Jaitsiera. Beteranoetan, Orio A taldeak helmuga lehenengo postuan zeharkatzea lortu zuen, eta B taldeak, berriz, zortzigarren egin zuen. Gizonen Orio B taldea, aldiz, ez zen nahi bezain fin aritu: hamalaugarren egin zuen hamasei taldek osatu zuten sailkapenean.