Gipuzkoako Foru Aldundiak jakinarazi du Bidegik 4,9 milioi euroko inbertsioa egingo duela "errepide sarearen segurtasuna eta erresistentzia indartzeko lanetan". AP-8 eta GI-20 errepideetako hainbat puntutan esku hartuko du, tartean Orion.
Drainatzea hobetzeko jarduketa berriak izango dira, eta Orion ez ezik, Usurbil, Zestoa eta Donostia parean ere egingo ditu.
Aldundiak azaldu duenez, egungo hodien ordez hodi seguruagoak eta eraginkorragoak jarriko dituzte uholdeak prebenitzeko helburuarekin, eta lanak urteko bigarren seihilekoan egingo dituzte.
Obrek eragin gutxi zirkulazioan
Obrak zangarik gabeko tekniken bidez egingo dituzte, bide azpiegituraren beraren pean jardunez, eta horrek "nabarmen murriztuko du ingurunean eta zirkulazioan izango duen eragina", azpimarratu dute. Intzidentziak batez ere bazterbideetan kontzentratuko direla dio aldundiak, eta, noizean behin, erreiren bat aldi baterako moztu beharko dela, seinaleztapen eta balizatze lanak errazteko.
Epeei dagokienez, jarduketek hamaika hilabete eta erdi irautea aurreikusi dute.