Iragarri dute dagoeneko azken hiru urteotan Orio Arraunketa Elkarteko taldeek irabazitako banderak noiz bedeinkatuko dituzten: abenduaren 8an izango da elizkizuna, eta ohi bezala, bazkaria egingo dute gero Arraunetxen.
Arraun elkartetik 13:00etan hartuko dute elizarainoko bidea, 70 banderak soinean dituztela, eta 13:15ean hasiko dute elizkizuna. Bukatutakoan, 13:45 aldera, argazkia aterako dute Herriko plazan, eta Karela kiroldegian elkartuko dira gero, elkarrekin bazkaltzeko. Alaitz Roteta, Gorka Valdes eta Hekthorfolk musikariak arduratuko dira bazkaria girotzeaz.
Helduek honako menua izango dute: iberikoak, entsalada epela, urdaiazpiko kroketak, zapoa parrillan, txerri saiheskiak parrillan, kremazko hostopila natilekin, ogia, kafea eta edaria. Haurrek, berriz, honakoa: iberikoak, urdaiazpiko kroketak, baserriko oilaskoa patatekin eta txokolatezko tarta.
Dagoeneko salgai dira bazkarirako txartelak, Kutixin eta Errustan. Helduek 35 euro ordaindu beharko dituzte txartela eskuratzeko; haurrek, 15. Abenduaren 2a da txartelak erosteko azken eguna.