San Martin jaiak ospatuko dituzte Ortzaika auzoan azaroaren 6an hasi eta azaroaren 16ra arte. Urtero bezala, ekitaldiz betetako egitaraua prestatu dute San Martin bailarako nahiz inguruetako bizilagun guztien gozagarri. Aurtengoan, besteak beste, herri kirolen erakustaldia, musika emanaldiak, kalejirak eta haurrentzako jolasak izango dira nagusi jaietan, baita afari girotua ere.
Larunbatean izango da azken hitzordu hori, 21:00etan hasita, hain zuzen, eta txartelak bihar arte izango dira eskuragai Kutixin eta Olidenen, 30 euroren truke. Menuari dagokionez, patea, entsalada mistoa, kroketak, txerri saiheskiak, oilasko errea, kontesa eta kafea egongo dira, edaria barne.