Ekonomia zirkularra sustatzea helburu duen Zuk konpondu, zuk berrerabili kanpainak gaur izango du azken hitzordua Orion. Urola Kostako Udal Elkarteak (UKUE) Emaus fundazioarekin elkarlanean jarri du martxan egitasmoa, eta aurretik Zarautzen, Getarian, Aian eta Zumaian egin ditu geldialdiak.
Gaur Orion dute hitzordua herritarrek; izan ere, 11:00etan zabaldu dute Herriko Plazan bigarren eskuko produktuen azoka. Berokiak eta askotariko arropak jarri dituzte salgai, baita altzariak ere. Azoka 19:00ak alde egongo da zabalik.
Arratsaldean, gainera, azokaren gune berean jarri dituzten mahaietan konponketa tailerrak egingo dituzte. Batetik, 16:00etan hasita, joskintza tailerra egin dute, eta, esaterako, praken galtza barrenak hartzen edo botoiak josten irakatsiko dute. Ordubete beranduago, 17:00etan, hasiko da gailu elektrikoak eta elektronikoak konpontzeko tailerra. Bi saioetara kaltetutako arropak edo matxuratutako gailuak eramateko eskatu diete herritarriei, haiei bigarren bizitza ematen saiatuko baitira.