Orio Eraginek etxean jokatu du Euskal Ligako bere aurreneko partida, eta garaipenarekin estreinatu da maila horretan. Gainera, Zarautz izan du aurkari; partida berezia izan da, beraz.
Hitzordua atzo izan zen, 13:00etan, Karela kiroldegian, eta harmailak bete ez baziren ere, ikusleen animorik ez zuten falta izan etxekoek.
Lehiakor aritu ziren bi taldeak, eta zarauztarrak gutxigatik baina aurrez iritsi ziren atsedenaldira. Ordea, bigarren zatian buelta eman zioten egoerari oriotarrek, eta 31-27 emaitzarekin irabazi zuten partida.
Ander Agote entrenatzaileak partidaren balorazioa egin zion atzo Gukari, eta azaldu zuen bere taldea ez zela eroso sentitu partida osoan zehar, eta beraz, ez zutela partidaz gozatu. Baina taldeari alde onak ere ikusi zizkion, eta azaldu du hortik etorri zela garaipena eta aurrera begira balioko duela: "Sentsazioak onak ziren, baina ez genuen asmatzen. Uste dut presio puntu batekin gaundela denok. Inportantea izan da, ordea, gauzak atera ez arren ez garela erori, ez dugula etsi, eta bukaeran markagailuari buelta ematea lortu dugula. Uste dut oso ondo etorriko zaigula garaipen hau".