Gipuzkoako Foru Aldundiko Kultura eta Lankidetza Departamentuak, Mestiza Elkartearen laguntzarekin, Bookstart Euskadi Gipuzkoa proiektuaren laugarren edizioa jarri du martxan. Egitasmoaren helburua eskolaurreko haurren artean euskarazko, gaztelaniazko eta ingelesezko irakurketa sustatzea da, eta aurten guztira 1.000 liburu sorta banatuko dituzte, doan, lurraldeko bederatzi herritan, tartean Orion.
Goizane Alvarez Kultura eta Lankidetzako diputatuak azpimarratu duenez, departamentuak 20.000 euro bideratu ditu proiektu honetara eta horrelako ekimenekin "irakurtzeko ohitura haur txikiei hurbiltzen zaie modu ludiko eta unibertsalean. Eta horrela, apurka-apurka eta txikitatik hasita, irakurzaletasuna sendotzen da. Irakurriz ezagutza barneratzen da, eta ezagutzak gizarte prestatuago, kritikoago eta aurreratuago bihurtzen gaitu".
Banatuko diren mila liburu sorten barruan, zati handi bat 0 eta 3 urte bitarteko haurrentzat izango da, eta 5 urtera arte iritsiko da biztanle gutxiko herrietan. Programaren barruan aurki daitezke, halaber, premia bereziak –entzumenekoak, ikusmenekoak eta motorrak– dituzten haurrentzako liburu sortak, "funtsezkoa baita haurrentzako eta haien familientzako eskaintza inklusiboa eskaintzea".
Liburu sorta jaso ahal izateko, Ana Molina Mestizako presidenteak azaldu du bederatzi udalerri horietan adin tarte horietako adingabeak dituzten etxe guztiek gutun bat jasoko dutela posta arruntez, eta bertan udal liburutegira edo Haurreskolara gonbidatuko dituztela jasotzera.
Sorta bakoitzak euskarazko, gaztelaniazko eta ingelesezko liburu bana izango du. Horrez gain, txikitatik irakurtzeak dituen onurei buruzko informazio liburuxka bat, errimen eta abestien orri bat, eta QR kodea duen orri markagailu bat erantsiko dituzte. QR horrek Liburu Baby Klubak udal liburutegi publiko kolaboratzaileetan irakurzaletasuna sustatzeko egiten dituen doako jardueren egutegiarekin lotuko du.