Mikel Arostegi oriotarrak Kaikuko gizonezkoen taldea entrenatuko du datorren denboraldian. Hala jakinarazi du klubak gaur. Denboraldi zaila izan da aurtengoa bizkaitarrentzat, maila galdu baitute, eta datorren denboraldian KAE1 ligan lehiatuko baitira, Eusko Label ligatik jaitsita –sailkapen nagusian azken bigarren izan dira, 46 puntu eskuratuta, Caboren aurretik–.
Kaikuk Arostegiren ibilbide luzea goraipatu du, azpimarratuz 29 urte daramatzala arraunaren munduan, arraunlari gisa aurrena, eta entrenatzaile, azken urteetan. Orion, Zumaian, Getarian, Astilleron eta San Pedron arraun egindakoa dela gogorarazi du, eta azken horretan, 2015etik 2021era, Libiako entrenatzaile gisa ere aritu zela lehen mailan eta KAE1en.
Arostegi 2022an itzuli zen Oriora arraun egitera, eta Orioko gizonezkoen taldeko entrenatzailea izan zen iaz, denboraldi ona osatuz. Klubak, ordea, erabakita zuen Iker Zabala entrenatzaile bizkaitarra fitxatzea, eta aurtengo denboraldian Zabalak hartu du Arostegiren lekua.
"Mikel Arostegiren fitxaketarekin, Kaikuk arraun munduan esperientzia handia duen arraunlari eta entrenatzaile baten alde apustu egiten du Bizkaitarra 2026an zuzentzeko", adierazi du Kaikuk. "Horrek bultzada berria emango dio gizonezkoen traineruaren kirol proiektuari, aurtengo denboraldi zailaren ondoren", gaineratu du.