Orion dena prest dute datorren asteazkenean, hilaren 16an, Karmengo Amaren eguna ospatzeko. Ohi bezala, aurrena elizkizuna izango da Bariko San Nikolas parrokian, eta ordua ere zehaztu dute: 18:00etan izango da. Jarraian, 18:30 aldera, prozesioan moilara jaitsiko dute amabirjinaren irudia.
Urtero lorez eta arrantzale giroko apaingarriekin apaintzen dute Karmengo Amaren irudia arrantzale familietako kideek elizkizunaren aurretik, eta mezaren une batean, kandela bana piztuko dute herriko bapore bakoitzeko, baita herriko traineru bakoitzeko ere. Arrantzaleen familietako hildakoen alde ere eskatuko da.
Moilan, azkenik, dantzariek Aurreskua dantzatuko diote Karmengo Amari, eta erriotik moilara gerturatuko diren traineruak bedeinkatuko ditu Juan Pablo Aroztegi apaizak.