Ohi bezala, sanpedroetan barrakak jarriko dituzte herrian, arranpla aurreko plazoletan, eta udalak jakinarazi du akordioa erdietsi duela Afade elkartearekin, eta hala, barraketan ibiltzeko txartelak merkeago erosi ahalko direla festen atarian, ekainaren 26an, ostegunarekin. Egun horretan 1,5 euroan salduko dute txartel bakoitza. Hori bai, egun horretako txartelek ez dute balioko hurrengo egunetarako.
Horrez gain, aurreko aldietan bezala, oraingoan ere egunero zaratarik gabeko bi ordu izango dira barraketan, bereziki heziketa premia zehatzak dituzten haurren inklusioa errazteko. Ordutegia zehaztuta dago: 11:30etik 12:30era eta 17:00etatik 18:00etara kenduko dituzte musika eta bestelako soinuak barraketan.