Beti-Onak eskubaloi talde nafarrak European Cup txapelketa jokatuko du 2025-2026. denboraldian, eta talde horrekin bi oriotarrek ere jokatuko dute Europa mailan: Libe Arruabarrenak eta Laida Urbitartek, hain zuzen.
Europan lehiatzea klubarentzat ekonomikoki bideragarria zen aztertzen ibili da zuzendaritza, eta azkenean erabaki du pausoa ematea, klubak gaur argitaratu duen oharrean azaldu duenez: "Nafarroako eskubaloiak, Atarrabiako zaleek eta emakumezkoen kirolak merezi dute abentura europar hau bizitzea, eta pauso labur baina seguruak ematen jarraitzea Beti-Onak Kirol Elkartea buru duen proiektu honen hazkundean", esan du oharrean.
Jokalari oriotarrak ere pozarren dira klubaren erabakiarekin, Arruabarrenak hedabide honi kontatu dionez: "Oso pozik gaude horrelako esperientzia eta txapelketa bat jokatzeko aukera izateagatik. Taldeak ilusio handiarekik hartuko du erronka hau", esan du.