Orio Arraunketa Elkarteko neska-mutilek bikain amaitu dute aulki mugikorreko liga

Onintza Lete Arrieta 2025ko eka. 4a, 16:00

Oriotarren talde argazkia larunbatean Legution. (JJ Portos)

Batetik, Gipuzkoako Aulki Mugikorreko Txapelketan hamazazpi domina eskuratu zituen OAEk larunbatean Legution (Araba). Bestetik, Gipuzkoako Federazioak astelehenean eman zuen Gipuzkoako Ligako sailkapen orokorraren berri, eta Orio izan da garailea kadete mailan, eta beste guztietan zilarra lortu du.

Aulki mugikorrean bikain ibili dira beste behin Orio Arraunketa Elkarteko neska-mutilak. Larunbatean jokatu zuten Legution (Araba) Gipuzkoako Txapelketa, eta OAEk 17 domina lortu zituen, horietatik bederatzi urrezkoak, zazpi zilarrezkoak eta brontzezko bat.

Jardunaldi hori Gipuzkoako Ligarako ere puntuagarria izan zen –laugarren eta azken jardunaldia–. Gipuzkoako Federazioak astelehenean publikatu zituen ligan metatutako puntuak –klubeko talde guztiak kontuan hartuta, neska zein mutil–, eta sailkapen orokorren berri eman zuen. Hala, Orio izan da garailea kadete mailan, eta beste mailetan zilarra lortu du –infantil, jubenil eta senior mailetan–.

Garaipen horrengatik lortu duten bandera larunbat honetan jasoko dute, Legution, Euskadiko Txapelketaren jardunaldiaren ondoren.

Orio Gukak zu bezalako irakurleen babesa behar du tokiko informazioa euskaraz eta modu profesionalean lantzen jarraitzeko.


Izan Gukakide