Gorengo Mailatik Ohorezko Mailara igotzeko fasea jokatzen ari dira Orioko Futbol Taldeko emakumezkoak, eta atzo arratsaldean garaipen garrantzitsua eskuratu zuten Aitor Arregiren jokalariek Mendibeltzen izandako partidan. Intxaurdi B taldearen aurka lehiatu ziren bertan, eta 2-1 emaitzarekin irabazi zuten norgehiagoka, Jugik eta Itzik markatutako golei esker. "Partida gogor eta zaila" izan arren, Orioko neskak gero eta gertuago daude Ohorezko Mailatik.
Garaipena eskuratuta, Oriokoek beste multzoko bigarrenaren aurka jokatuko dute hurrengo partida, Aitzondo taldearen aurka, zehazki. Partida horretako garaileak mailaz igotzeko txartela eskuratuko luke.
Emakume seniorrak ez ezik, Orioko Futbol Taldeko kadete neskek ere norgehiagoka garrantzitsua jokatu zuten atzokoan, izan ere, Ohorezko Mailara sailkatzea lortu dute.
