Baztan bailarako Lekaroz auzoan (Nafarroa) eraiki nahi duten Aroztegia proiektuaren aurkako erresistentzia jaialdia antolatu du Etxeluze gaztetxeak gaur arratsalde-gauerako, eta jasotako ekarpen guztiak "aroztegiaren aurkako erresistentzia kutxara" bideratuko dituzte.
Herritarrak proiektuaren inguruan kontzientziatzeko hitzaldi bat eskainiko dute aurrena, 19:30ean hasita. Proiektuak Baztango bailaran eragingo dituen ondorioak izango dituzte hizpide.
Hitzaldiaren ostean, bertaratutakoek afaltzeko aukera izango dute, 21:00etan, eta egunari amaiera emateko, Madame Birrots eta Kaskezur taldeek kontzertu bana eskainiko dute, 22:00etan hasita.