Udaberria kirol eta kultur ekitaldiz blai dator Oriora

Onintza Lete Arrieta 2025ko api. 4a, 12:18

Maialen Lujanbioren errezitaldia izango da, esaterako, maiatzaren 18an. (Utzitakoa)

Eragileekin batera udalak ia berrogei ekintza antolatu ditu apirilerako, maiatzerako eta ekainerako.

Orioko Udalak etxez etxe banatu berri du udaberrirako antolatutako ekitaldien programa, eta ohi bezala, askotariko jarduerak egongo dira apirilean, maiatzean eta ekainean; ia berrogei ekintza izango dira guztira. Horietako asko urteroko hitzordu garrantzitsuak dira, herriko eragileek antolatzen dituztenak, izan ikastetxe, musika eskola nahiz kirol elkarte. Horregatik, udalak "eskerrak" eman nahi izan dizkie eragile guztiei.

Udaberriko programako ekitaldi batzuei buruzko xehetasunak aurrerago emango dituzte, datak gerturatu ahala, baina udalak eman nahi izan ditu bestelako datu zehatz batzuk. Esaterako, jakinarazi du diru gehiago bideratu duela aurtengo udal aurrekontuan kultur ekintzetara: "Orioko Udalak kultura eta herriko kultur ekosistema indartzearen aldeko apustua egin du azken urteotan. 2025eko udal aurrekontuak osatzerakoan, 55.000 eurotik 70.000 eurotara igo zen kultur ekintzetara bideratutako diru partida. Partida horretako diruarekin programatzen dira urte osoko kultur emanaldiak", azaldu du.

Zehaztu du, hori bai, diru partida propioak dituztela San Pedro eta San Nikolas festek, eta beste festetarako ere (Gabonak, Inauteriak, auzoetako festak, Gazte Festak…) partida berezia dagoela.

Bestalde, azpimarratu du momentuko artista erreferenteak herrira ekartzeko egindako ahalegina: "Udaberriko agendako artisten kontrataziora 21.000 euro bideratu ditu udalak, eta egitarauan ikus daitekeenez, une honetan Euskal Herrian erreferente diren artistak programatu dira".

Honakoa da datozen hiru hilabeteetarako kultur eta kirol egitaraua:

Apirila

  • Apirilaren 2tik 6ra: Orioko herri-ikastolaren aste kulturala
  • Apirilaren 5ean, larunbata:
    • III. Elbira Zipiria aitortza-omenaldia, 12:00etan, Herriko Plazan.
    • Harribil dantza taldearen 30. urteurrenaren ospakizuna, Herriko Plazan.
    • Euskaraldia: hamalaukoaren aurkezpena, Herriko Plazan, 13:00etan.
  • Apirilaren 6an, igandea: Frankenstein agurgarria errezitaldi musikatua, Petti eta Ana Galarragarekin. Kultur etxean, 18:00etan.
  • Apirilaren 7an, astelehena: Danbolin Musika eta Dantza Eskolaren kontzertua. Kultur etxean, 19:00etan.
  • Apirilaren 11n, ostirala: Verde Pratoren kontzertua. Kultur etxean, 22:00etan.
  • Apirilaren 12an, larunbata:
    • Kitaldepare txaranga kalez kale, 12:30ean.
    • Nazioarteko Arraun Estropadak. Errioan, 18:00etan.
  • Apirilaren 26an, larunbata: Gipuzkoako aulki mugikorreko arraun txapelketa. Errioan, 16:30ean.
  • Apirilaren 28an, astelehena: Miriam Mendoza ipuin-kontalaria. Kultur Etxean, 18:00etan. HH3tik aurrerako haurrentzat.

Maiatza

  • Maiatzaren 8tik 20ra: Saharari buruzko erakusketa, Guerara Orio elkartearen eskutik. Kultur Etxean.
  • Maiatzaren 9an, ostirala: eskola-umeen literatur lehiaketaren sari banaketa. Udaletxean, 18:30ean.
  • Maiatzaren 10ean, larunbata: DanbolinFest jaialdia, Herriko Plazan.
  • Maiatzaren 11n, igandea: sortzaile eta artisau azoka Herriko Plazan eta Endaia Plazan, goizean.
  • Maiatzaren 14an, asteazkena: Ezinezkoaren alde liburuaren aurkezpen hitzaldia, Iñigo Martinezekin. Salatxo aretoan, 19:00etan.
  • Maiatzaren 15tik 25era: Euskaraldia.
  • Maiatzaren 16an, ostirala: kantu-afaria Euskaraldia eta Balearen Eguna uztartuz. Balea elkartean.
  • Maiatzaren 18an, igandea: RR-6 eRRe(AH)ala hitzaldi-errezitaldia, Maialen Lujanbiorekin. Zimitorio zaharrean, 19:00etan.
  • Maiatzaren 19tik 25era: Kukuarri astea, Talaimendi elkarteak antolatuta.
  • Maiatzaren 23tik 25era: garagardo azoka, Herriko Plazan.
  • Maiatzaren 24an, larunbata: beteranoen estropadak. Errioan, 14:00etan.
  • Maiatzaren 25ean, igandea:
    • Kukuarri Eguna.
    • Rioja filarmoniaren kontzertua: Jorge Nicolás Manrique, Alba Reirís eta Alba Carretero Lizaso. San Martin baselizan, 18:00etan.
  • Maiatzaren 26an, astelehena: Miriam Mendoza ipuin-kontalaria. Kultur Etxean, 18:00etan. HH3tik aurrerako haurrentzat.
  • Maiatzaren 30etik ekainaren 1era: garagardo azoka , Herriko Plazan.
  • Maiatzaren 31n, larunbata:
    • Kros txikia Zaragueta Herri Eskolatik abiatuta, 09:00etan.
    • OAE traineru aurkezpena. Herriko Plazan, 12:00etan.
    • V. Talaimendi Trail Orio, Talaimendi elkarteak antolatuta. Arranplako plazoletatik abiatuta, 17:00etan.

Ekaina

  • Ekainaren 1ean, igandea: Gipuzkoako Traineru Txapelketa. Errioan, 11:00etan.
  • Ekainaren 7an, larunbata: Orioko Herri Ikastolaren festa.
  • Ekainaren 13an, ostirala: Olaia Inziarteren kontzertua. Herriko Plazan, 20:00etan.
  • Ekainaren 14an, larunbata: Zaragueta Herri Eskolaren festa.
  • Ekainaren 16tik 20ra: Danbolin Musika eta Dantza eskolako entzunaldiak, Kultur Etxean.
  • Ekainaren 20tik 21era: Anibarko Portuko festak. Garmendiazpi auzo elkarteak antolatuta.
  • Ekainaren 21ean, larunbata: Orioko Futbol Taldearen festa, Orioko Herri Ikastolan.
  • Ekainaren 23an, astelehena: Sorgin gaua Harribil dantza taldearekin. Arranpla ondoko zabalgunean, 21:30ean.
  • Ekainaren 27tik uztailaren 1era: San Pedro festak.

Orio Gukak zu bezalako irakurleen babesa behar du tokiko informazioa euskaraz eta modu profesionalean lantzen jarraitzeko.


Izan Gukakide