Euskaraldia 2025

Larunbatean jakingo da nortzuk osatuko duten aurtengo Euskaraldiko Orioko 'hamalaukoa'

Onintza Lete Arrieta 2025ko api. 1a, 16:09

2020ko Euskaraldiko 'hamalaukoa' osatu zutenen talde argazkia. (Guka)

Aurkezpena Herriko Plazan izango da, 13:00etan, eta banan-banan aurkeztuko dituzte aurten herriaren enbaxadore izango diren ahobizi eta belarriprestak. Herritar guztiak daude gonbidatuta aurkezpenera.

Larunbat honetan, hilak 5, aurkeztuko du Oriok Euskaraldirako bere hamalaukoa: hau da, ahobizi eta belarriprest roletan ariko diren adin, genero eta jatorri anitzetako hamalau herritarrek osatutako taldea.

Maiatzaren 15etik 25era izango da aurten Euskaraldia, eta helburua da 11 egunez herritarrek euskara erabiltzea beren egunerokoan modu kontzientean. Horregatik, herri bakoitzak bere hamaikakoa aurkeztu ohi du Euskaraldiaren aurretik; Orion, berriz, hamalaukoa egiten da, trainerua ere hamalau lagunek osatzen dutelako.

Aurtengo enbaxadoreak larunbateko ekitaldian aurkeztuko dituzte banan-banan, Herriko Pazan, 13:00etan, eta Orioko Euskaraldiko lantaldeak herritar guztiak animatu ditu ekitaldian parte hartzera.

Orio Gukak zu bezalako irakurleen babesa behar du tokiko informazioa euskaraz eta modu profesionalean lantzen jarraitzeko.


Izan Gukakide