Espainiako Iraupen Txapelketak eta Selekzio Autonomikoen arteko Espainiako Txapelketak jokatu dituzte asteburuan Galizian, Castrelo do Miñon, eta lan ona eginda eta dominak eskuratuta itzuli dira beste behin arraunlari oriotarrak aulki mugikorreko probatik.
Espainiako Iraupen Txapelketak larunbat goizean jokatu zituzten estatuko 56 elkartek. Oriotarrek hamabi ontzi uretaratu zituzten, eta baita brontzezko domina eskuratu ere: mutil kadeteek lortu zuten hirugarren postu hori, skull bikoitzean.
Larunbat arratsaldean eta igande goizean, berriz, Selekzio Autonomikoen arteko Espainiako Txapelketak jokatu zituzten lau eta zortzi arraunlariko ontziek. Espainiako estatuko bederatzi komunitatek parte hartu zuten, tartean Euskadiko Selekazioak, eta bertan dozena bat arraunlari oriotar izan ziren lehian. Oriotarrek lau domina eskuratu zituzten Euskadi ordezkatuz, zilarrezko hiru domina eta brontzezko bat. Zilarrak jubeniletan eskuratu zituzten, zortzikoan mutilek eta neskek, eta kadeteetan, skull laukoan neskek. Brontzezko domina, berriz, jubenilek eskuratu zuten, lemazain gabeko laukoan.
Sailkapen orokorrean, hirugarren postuan sailkatu zen Euskal Selekzioa, Andaluziaren eta Kataluniaren atzetik.
