Zarauzko Hondartzako Futbol Txapelketan hamar talde ari dira lehian aurtengo denboraldian, eta azken urtetan gorako joera hartu duen arren, gizonezkoetan dagoen talde kopurutik urrun dago oraindik. Hori kontuan hartuta, eta bereziki emakumeen plaieroak indartzeko eta herrian ikusgarritasuna emateko, Emakume Futbolari Eguna ospatu dute gaur goizean bigarren urtez Zarauzko hondartzan.
Zarauzko Plaieroetako antolakuntzak egindako deialdiak erantzun bikaina izan du beste urte batez. Izan ere, hemezortzi izan dira emakumeei zuzendutako jardunaldi berezian parte hartu duten taldeak; gehienak Zarauzkoak izan dira, baina tartean Orioko ordezkaritza ederra izan da. Guztira, lau talde aurkeztu dira, eta horietako askok Orio Eraginen elastikoarekin jokatu dute, gainera. Hondartza okupatzea zuten xede gaurkoan, eta helburua sobera bete dute: bederatzi joko eremu hartu dituzte partidak jokatzeko, Muskaria aurreik Beraza pareraino gutxi gorabehera.
Talde parte-hartzaileak 08:30ean elkartu dira malekoian, plaieroetako lokalaren aurrean, eta ordezkariekin izen-emateak berretsi ondoren, ateak eta sareak bizkarrean hartuta, norbere joko eremura joan da. Norgehiagokak 09:15 aldera hasi dira, eta talde bakoitzak bi partida jokatu ditu; neurketa bakoitza 15 minutuko bi zatitan banatu dute.
Egitasmoak ez du txapelketa dinamikarik izan, lagunartean eta giro atseginean hondartzako futbolaz gozatzea ez besterik. Epailerik ere ez dute izan, eta jokalariek eurek zuzendu dituzte haien norgehiagokak inolako arazorik gabe. Amaieran, indarberritzeko eta goizeko hotzetik berotzeko, parte hartzaile guztiei txokolate beroa banatuko diete lokal aurrean.