Gipuzkoako Artisten Elkarteak erakusketa zabalduko du bihar, ostiralarekin, Donostiako Ernest Lluch kultur etxean (19:00). Hainbat obra jarriko dituzte ikusgai; tartean, Iñaki Arrillagak burdinez egindako Atea zabalik eskultura. Izan ere, elkarte horrek, erakusketa osatzeko, oriotarraren lan hori hautatu du besteren artean. Urtarrilaren bukaerara arte egongo da zabalik erakusketa.
Gipuzkoako Artisten Elkartea 75. urtemuga ari da ospatzen aurten, eta ospakizunen barruan, kultura eta arte sorkuntza bultzatzeko eta sustatzeko xedez, pintura eta formatu txikiko eskultura sariketa antolatu du. Hainbat lan aurkeztu dituzte sariketara, eta besteak beste erakusketarako aukeratua izan da Arrillagaren eskultura.