Ekimenaren helburua da herriko hitzak eta esamoldeak jaso eta zabaltzea. "Belaunaldi berriek [esamoldeak] ezagutu ditzaten eta normaltasunez erabili ditzaten", azaldu du udalak.
Urtarrilean hasi eta ekainera bitarte, bilketa-lan "mardula egin zuen Pardinak, izan ere, 600etik gora hitz eta esamolde jaso, sailkatu eta antolatu ditu. Gehienak, ahotsak.eus webguneko Orioko adinekoei grabatutako elkarrizketen bidez jaso ditu, edota oriotarrek han eta hemen publikatutako testuen hustuketa eginez; baina kalean entzundako hizkera bizi-biziko aleak ere jaso ditu tarteka.
Asteroko pilulak
Bilduma zabala denez, hitz eta esamolde horiek apurka zabaltzea erabaki du udalak. Sare sozialen bidez, astean behin, hitz edo esamolde baten berri emango dute, esanahia argituz eta erabilera-adibideak proposatuz: "Astero pilula bat eskainiko da, herritarren eskura jartzeko, ezagutu eta erabili dezaten".
Udalak gehitu du, sare sozialek elkarrizketarako ematen duten aukeraz baliatuta, herritarrei "gonbita" egiten zaiela haiek ezagutzen edo erabiltzen dituzten herriko esamoldeak partekatzeko eta, hartara, "bilduma aberasteko".