ETE eta KAE1 ligak lehiatzen ari diren traineruel asteburu luzea izango dutela esan daiteke. Gaur bertan Plentzian izango dituzte estropadak Zumaia, Zarautz eta Orio B traineruak.
11:40an hasiko da ETE Ligarako puntuagarria den ETE Ligako bandera. Zumaia eta Zarauzko traineruak arituko dira bertan. Haren amaieran, KAE1 ligarako puntuak ematen dituen Plentziako XXXV. ikurriña jokatuko dute. 12:40an hasiko dira estropada honetako txandak. Zumaia, Zarautz eta Orio B izango dira arraunean Bizkaiko herrian.
Larunbatean, goizez, Zarauzko arraun elkartearen IV. Ikurriña jokatuko dute emakumeek, ETE Ligarako azken aurreko estropada puntuagarria. 11:00etan hasiko da estropada hau. Hiru ordu laurden geroago, 11:45ean, KAE1 ligako Zarauzko arraun elkartearen XV. Ikurriña jokatuko dute.
Igandean ere ETE eta KAE1 ligetako estropadak izango dira, kasu honetan Bilbon. ETE Ligakoa, Emakumeen IV. Bilboko Ikurriña – Ane Aizpururen IV. Oroimenezkoa, 16:00etan hasiko da. Ondoren, KAE1eko estropada jokatuko dute, 16:40an hasita: XLVI. Villa de Bilbao Ikurriña.
