Orioko Bate Bizkorrak (OBB) sofbol taldeak etxean jokatutako bi partidak irabazi ditu. Valentziako Fenix taldearen aurka izan zituen bi norgehiagokak pasa den asteburuan, eta "interesgarriak" izan ziren biak ere taldekideen hitzetan. Izan ere, ordura arte, "oriotarrak bigarren zeuden sailkapen-taulan, eta valentziarrak hirugarren ziren, garaipen bakar batez bereizita". Bi partidak oriotarrek irabazita, sailkapenean gora egin dute etxekoek, eta Espainiako ligako lehen fasea bigarren postuan amaituko dute –egungo txapelduna den Rivasengandik bost garaipenetara–.
Lehen fase honen ondoren, ekainaren 2an hasiko da bigarren fasea, non taldeak bi multzotan sailkatuko diren. Lehen multzoan arituko dira garaipen gehien dituzten sei taldeak –oriotarrak barne–, eta gainerakoak bigarren jardungo dute.