Gauerdian iritsiko da 23. Korrika Oriora, eta herritarrak hasi dira euskararen aldeko ekimen hunkigarrienerako giroketa lanak egiten. Saio horietako lehenean, 15:00etatik 16:00etara, Korrika Txikiak hartu ditu herriko kaleak hasi hondartzatik eta Ibai Ondora arte.
Plazan amaitu dute korrika saioa adin guztietako Zaragueta Herri Eskolako eta Orioko Herri Ikastolako ehunka ikaslek, eta horietako bik irakurri dute lekukoaren barruko mezua. "Egindako bideaz harro" eta "elkar hartuta pauso gehiago emateko" aldarrikapena egin dute.
Eguraldia lagun, herritar askok ikusi dute Korrika Txikia, eta giro polita sortu da. Giro horrek iluntzean izango du segida, 19:00etan bertso poteoa egingo dutelako Eneritz Artetxe eta Iñaki Gurrutxagarekin, eta kalez kale ibili ondoren, 20:30ean pintxo jana egiteko elkartuko dira herritarrak plazan.