Gipuzkoako Ibilbide Luzeko Txapelketa atzo goizean jokatu zen Irunen, Bidasoan, eta oriotarrak beste behin emaitza bikainekin etxeratu dira aulki mugikorreko saioetatik: urrezko hiru domina eskuratu zituzten, zilarrezko sei, eta brontzezko beste bi.
Urreetako bat gizonezko kadeteek skull laukoan lortu zuten, bestea skiff bakarkakoan gizonezko infantiletan eta, hirugarrena, skull bikoan, gizonezko jubeniletan.
Zilarrak, skull laukoan gizonezko kadeteek eta infantilek; skiff bakarkakoan emakume beteranoetan, gizonezko absolutuetan eta gizon jubeniletan; eta lemazaindun gabeko bikoan gizon jubenilek lortu zituzten.
Brontzeak skull laukoan eta skull bikoitzean lortu zituzten emakume kadeteek eta emakume jubenilek.
Oriotarrek 26 ontzi aurkeztu zituzten guztira, 80 arraunlarirekin, baina bi ontzi lehiaketatik kanpo gelditu ziren beraien maila eta modalitatean beste ontzirik ez zelako aurkeztu: emakume infantilen lemazaindun skull zortzikoa eta lemazaindun zortzikoa, hain zuzen.
