Azaroak 25 ditu gaur, eta Indarkeria Matxistaren Aurkako Nazioarteko Eguna da. Beste hainbat txokotan bezala, Orion ere bat egin dute aldarri feministekin, eta horregatik, elkarretaratzea egin dute Arrantzale kaleko parkean, Lourdes del Hoyo bere bikotekide ohiak hil zuen lekuan.
12:00etan hasi da elkarretaratzea, eta bertan dozenaka herritar bildu dira Denon bizitzak erdigunean! zioen pankartaren bueltan. Isilune tarte baten ondoren, Saregile Orioko Emakumeen Etxeko hainbat kidek hitz egin dute. Lehenik, Lourdes del Hoyo gogoratu nahi izan dute, eta azaldu dute ez dutela maiatzaren 16 hura "inoiz ahaztuko". "Samina erraietan daukagu, eta gaur gure bihotzak zugan jarri nahi ditugu", azaldu dute. Emakumeek "beren gorputzaren jabe" eta espazio publikoak hartzeko "aske" izan nahi dutela ere gaineratu dute, baita "botere harremanetan ez oinarritutako harremanak" eraiki nahi dituztela ere. Hori horrela, Azaroaren 30eko Greba Feminista Orokorrean parte hartzera gonbidatu dituzte Saregileko kideek herritarrak.