Kontxako Banderarik ez dator gaur Oriora, baina herriko bi traineruak gustura egoteko moduan dira, banderak irabazita bezala ospatu dutelako Kontxako bigarren jardunaldia Orioko zaleek. Animatu ere, tope animatu dituzte arraunlariak goizean goizetik. Bai herrian, bai Donostian.
Ohi bezala, oraingoan ere kolore horia izan da nagusi Donostiako badia inguruan. Paseo Berrian, esaterako, ia beste kolorerik ezin zitekeen ikusi. 10:00etarako tokia hartuta zuten askok, jan-edanak prest, eguerdira arte hantxe egoteko inora mugitu gabe. Handik pasatu dira emakumezko zein gizonezko arraunlariak, eta denei harrera beroa egin diete zaleek. Batzuek, hori bai, komeni baino petardo eta koloretako ke pote gehiago erabili dituzte une zehatz batzuetan.
Arranplan, berriz, txaranga jendetsuarekin topo egin dute arraunlariek, eta nesken trainerura arraunlari asko hunkituta igo dira, txarangak Mirotza abestia jo duenean.
Hirugarren amaitu dute estropada emakumezkoek eta bosgarren gizonezkoek, baina irabazleen pare hartu dituzte bi traineruak herriko zaleek, bereziki zale gaztetxoek; festarako gogotsu zeuden horiek, izan ere. Haurrak eta helduak tristeago zeuden, nahiz eta denek txalotu Orioko arraunlarien lana eta esfortzua.
Zalantzarik gabe, gaurko banderak afizioarentzat izan dira.
