Orio nagusi izan da lehen txandan, eta aise irabazi du bere estropada. Egin beharreko lanak ongi egin dituzte, eta datorren igandean Ohorezko Txandan izango da. Baina beharbada multzo apalena tokatu zaio eta hori bistakoa izan da bigarren txandan. Izan ere, hasiera-hasieratik erreferentzia onenak egiten hasi dira Donostiarrak, eta orpoz orpo jarraitu dute Arraun Lagunak eta Tolosaldea traineruek. Ziabogara Orio baino segundo batzuk azkarrago iritsi dira, eta hortik aurrera lehia bizia bezain ikusgarria eskaini dutek hirurek, non Tolosaldeak eman duen kolpea, estropada justugatik irabaziz.
Hala, Kontxako Banderako bigarren igandeko Ohorezko Txandan Tolosaldea, Donostiarra, Arraun Lagunak eta Orio ariko dira. Guztiak ere lauzpabost segundo eskasen bueltan amaitu dute, beraz, lehia irekia geratzen da oraindik ere. Elkarren arteko aldeak oso txikiak izanda, datorren astean hutsetik hasiko dela lehia adierazi dute talde guztiek.
Zumaiarentzat sari handia izan da Donostiako Estropadetara sailkatzea eta gaurkoan txukun lehiatu den arren, ezinezkoa izan du goiko postuetan aritzen diren traineruen pare aritzea. Hala ere, play-off kanporaketan aurkari izango dituen ontziekin indarrak neurtzeko parada izan dute: Hibaika aurretik helmugaratu da eta 7 segundo atera dizkio, baina Kaiku atzea utzi du, 11 segundora. Datorren astean, kontsolazio txanda ariko dira hirurak Hondarribiarekin batera.
Sailkapena
1. Tolosaldea 10:37.64
2. Donostiarra 10:37.82
3. Arraun Lagunak 10.39.80
4. Orio 10:42.30
5. Hibaika 10:57.22
6. Hondarribia 10:59.32
7. Zumaia 11:04.86
8. Kaiku 11:15.56
