Donostiako Estropadetako lehen igandea da gaurkoa. Arraun denboraldiko hitzordu garrantzitsuena, zalantzarik gabe, eta lehian ariko diren traineruek helburu bakarra izango dute: Kontxako Bandera lortzeko ahalik eta lan txukunena egin eta denbora onena egitea. Horien artean izango dira Orioko bi ordezkariak, bai emakumeak bai gizonak, Zumaiako emakumeen ontzia eta Getariako Esperantza, eta goizean goizetik zaletuak Donostiara bidean jarri dira.
Estropadetako kaleen zozketa ere egin dute, eta zoriak hala erabakita, modu honetan egingo dute arraunean. Emakumeak 11:00etan hasiko dira, eta Orio eta Zumaia lehen multzoan ariko dira lehian, Kaiku eta Hibaikarekin batera. Kaiku lehen kalean ariko da, Orio bigarrenean, Zumaia hirugarrenea eta Hibaika laugarrenean. Bigarren txanda horrela geratu da: lehen kalean Donostiarrak, bigarrenean Tolosaldea, hirugarrenean Arraun Lagunak eta laugarrenean Hondarribia.
Gizonezkoetan, lehen txandan ariko da Orio bigarren kaletik; Hondarribia lehen kalean, hirugarrenean Donostiarra eta laugarrenean Zierbena. Bigarren txandan egingo du aurrean, berriz, Getariak. Lehen kalea egokitu zaio esperantzari, bigarrena Cabori, hirugarrena Urdaibairi eta laugarrena Ondarroari.
