#KONTXA100 proiektuaren baitan, #KONTXA1923 ekimena jarri dute martxan Euskal Itsas Museoak eta Aquariumak, Donostiako Udalarekin elkarlanean. Zazpigarren urtez jarraian, Donostiako Estropaden ondare kultural eta historikoa azpimarratu nahi dute, duela 100 urteko estropadetan gertatutakoaren historia berreskuratuz. Hala, aurten, 1923ko estropadak ikertu eta zabalduko dute; hain zuzen ere Kontxako Banderako edizio hori Orioko traineruak irabazi zuen Antonio Maria Uranga patroi zela. Bi aldiz atzeratu behar izan zuten estropada itsasoaren egoera txarragatik, eta, azkenean, irailaren 30ean jokatu zuten.
#KONTXA1923 ekimenaren barruan egitarau zabala antolatu dute, eta besteak beste KONTXA1923: Duela 100 urteko estropada izeneko erakusketa ireki dute Euskal Itsas Museoanm irailaren 1etik 17ra. Erakusketak 1923ko estropadan gertatutakoa azaltzen du irudi eta objektuen bidez, eta ikusgai jarri dute 1923an Oriok irabazitako bandera.