Galiziako Xunta eta Itsasoko Kontseilaritza kanpaina ari dira egiten Galiziako itsas produktuak ezagutzera emateko eta Pescaderías zigilua bultzatzeko. Arrantza artisau eran egiten dute zigilu hori daramaten produktuen enpresek, eta herriz herri dabiltza, Done Jakue bideari jarraika, herritarrei produktu horiekin egindako mokaduak eskainiz.
Otsailean Galizian hasi zuten bidea, eta atzo Zarautzera iritsi ziren. Gaur, osteguna, Orion daude goizetik. Eguerdian atsedenaldia egin ondoren, arratsaldean 17:00etatik 20:00etara egongo dira, eta gerturatzen direnek doan dastatu ahal izango dituzte pintxo nahiz kroketa gozoak. Gaur bakarrik egongo dira Orion, eta bihar, Irun aldera jarraituko dute bidea.
Mokadu zaporetsuak
Eguerdi partean bi eratako kroketak eta opil bat dastatzeko aukera egon da. Opilak babarrun mousse-a darama, Albariño ardotan eskabetxatutako muskuilua eta wakame alga. Kroketak, berriz, batek txibia bere tintan, eta besteak, Galiziako gazta mota bat sardinarekin eta marmeladarekin.
Arratsalde partean, berriz, "haurrentzat aproposagoak" diren mokaduak eskainiko dituzte.