Orioko EAJk "zaintza beharrak dituzten pertsonak erdigunean jarriz, erakunde, eragile eta herritarren inplikazioarekin oriotar guztien bizi kalitatea hobetuko duen ekosistema bat" sortu nahi du. Hain zuzen ere, proiektuaren inguruan hitz egiteko herriko gizarte eragileekin bildu ziren ostiralean EAJko alkategai Noemi Ostolaza eta Gipuzkoako Foru Aldundiko Gizarte Politikako diputatu Maite Peña. Bileran izan ziren Eguneko Zentroko, Zaharren Babes Lekuko, Ostargi, Esperientzia Eskola eta Ahalduntze Eskolako ordezkariak. Maite Peña diputatuak Zaintza HerriLab estrategiaren berri eman zien eragileei, eta azaldu zien herrietan "proiektu komunitario, partekatu eta berritzaileak" garatzen ari direla, "mendekotasun egoeran dauden herritarren bizi kalitatea hobetzeko".
Hain zuzen ere, EAJko alkategai Noemi Ostolazak azaldu zuen bere alderdiak prestatutako programaren "giltzarria" izango dela zaintzaren arloa, "osasunarekin eta berdintasunarekin batera". "Orio eta oriotarren izaera, aniztasuna eta ongizatea oinarri hartuta egingo dugu lan, egungo eta etorkizuneko erronkei aurre egiteko prest egongo den herri bat eraikitzeko".
Ostolazak eragileei adierazi zien zaintza ekosistemaren bidez, "adinekoen zaintza beharrez gain, kolektibo desberdinek dituzten beharrei erantzuteko prest" dagoen herria eraiki nahi dela, "pertsonalizazioan, berrikuntzan eta komunitateak duen indarrean oinarrituta". Zentzu horretan uste du eragileek "paper garrantzitsua" izango dutela, eta horregatik proiektua "hasiera-hasieratik elkarlanean lantzeko" konpromisoa hartu du.
Ostolazak gogoratu zuen EAJk "konpromiso sendoa duela Oriorekin". Hala, jeltzaleena "oriotar guztien kezkak entzun, lehentasunak ezarri eta lanerako prest" dagoen taldea dela azpimarratu zuen. "Zaintza ekosistemaren bidez, adinean aurrera doazen oriotar guztiak herrian bertan zainduak izateko aukera bermatzeko lan egingo dugu buru-belarri".