Oriotarrak festa gosez direla nabari da, jendetza bildu baita gaur plazan, sanikolasei hasiera emateko ekitaldian. Aurtengoan, Maria Kristina Atorrasagasti omendu dute, 50 urtez Odol Emaileen Elkarteko Orioko ordezkaria izan dena, eta hunkituta jaso du herritarren aitortza. Ekitaldiaren hasieran, agurra dantzatu diote Harribil dantza taldeko kideek, eta ondoren herriko bandera igo du udaletxeko balkoitik. Anuska Alkateak eskaini dizkion esker on hitzen ondoren, mikrofonoa hartu eta hitz batzuk esatera ere animatu da Atorrasagasti, eta omenaldiagatik eskerrak eman eta herritarrak odola ematera animatu ondoren, "Aupa Orio" esanez, bukatu du bere hitzartzea, herritarren txalo zaparrada artean.