Zaleen bultzadarik ez zaie falta izan gaurkoan ere Orio Orialkiko neska-mutilei Kontxako Banderako lehenengo jardunaldia jokatzerakoan. Donostiako Paseo Berria kolore horiz estali dute dozenaka eta dozenaka zaletuk, eta portuko txoko batean eta bestean ere kolore ikusienetakoa izan da.
Familiak haur txiki nahiz koskortuekin, jubilatu kuadrillak, gaztetxo eta gazte taldeak... Kolore horiak adin guztiak harrapatu ditu, eta giro paregabea jarri dute goizean goizetik.
Pankarta eta bandera erraldoi batzuk ere jarri dituzte han-hemenka, eta herriko bi traineruak gogoz animatu dituzte. Emakumezkoen traineruak etxeko lanak ondo egin, eta estropada irabazi du Arraun Lagunaki bi segundoko errenta aterata, eta poza nabaria izan da arranplan. Gizonezkoen trainerua, berriz, ez da hain fin ibili, eta ohorezko txandatik kanpora gelditu da, bosgarren eginda. Estropada amaieran arraunlari eta klubeko kideen artean nabaria zen tristura, baina zaleek bikain erantzun dute, eta saiatu dira arraunlariak animatzen kantuan eta oihuka.
