Duela 121 urte bezala, herritarrek ongietorri beroa egin diete balea harrapatu duten arrantzaleei

13:00ak aldera, kanpai hotsa izan da arrantzaleak ohartarazi dituena, eta bost traineru joan dira errioan behera. Moila eta zubia jendez estalita zeuden ordurako, inork ez baitzuen ikuskizuna galdu nahi. Ordu erdi bat behar izan dute atzera berriz errioan gora etortzeko, harrapatutako balea sokaz lotuta zekarkitela. Herritarrek txalo eta oihu artean hartu dituzte balentria egindako arrantzaleak, eta Salatxo abesbatzak eta Harribil dantza taldeak balearen bertsoak abestuz eta dantzatuz egin diete ongietorria.