Asteburu honetan ere, arraunzaleek izango dute zer gozatua errioan. Igandean, 12:00etatik aurrera, aulki mugikorreko estropadak ikusteko aukera izango da. Zehazki, Gipuzkoako Aulki Mugikorreko 4.jardunaldia jokatuko dute estropalariek.
Bada berritasun bat igandera begira. Orain arte, estropada guztiak jaitsiera modalitatean egin dituzte, eta ontziak banaka-banaka atera izan dira, elkarren segidan. Hemendik aurrera, distantzia motzagoetan egingo dute arraunean estropalariek, eta aurkariak ondoan izango dituzte. Hau da, irteeratik, lerroz-lerro jarrita aterako dira ontziak.
Antolatzaileek bi ibilbide egokitu dituzte estropadetarako. Izan ere, seniorrek, jubenilek eta kadeteek 1.500 metro egingo dituzte arraunean, eta infantil eta beteranoek 1.000. Ibilbide luzeak Sarikola inguruan izango du irteera puntua, eta besteak Anibarko Portua eta Ortzaika artean.