Orio Arraunketa Elkarteak baieztatu du berria: datorren denboraldian Ander Etxegoien izango da mutilen lehen traineruko patroia. 34 urte ditu Etxegoienek eta getariarra da, nahiz eta azken urteotan Azpeitian bizi den.
Etxegoienek umetan heldu zion arraunari, 10 urte zituela, eta 24 urte daramatza kirol horri lotuta. Urte horietako gehienak jaioterriko klubean egin dituen arren, San Pedrotik dator Oriora, talde morean hiru denboraldi eginda. Datu bat aipatzearren, 2018an, Libiaren gidaritza hartu zuen urtean, beretzat izan zen TKE ligako patroi onenaren saria. Oriora "motibazio handiarekin eta ilusioz" datorrela ziurtatu du klubak.
Etxegoieni ongietorria ematearekin batera, Ugaitz Mendizabali eskerrak eman dizkio Orio Arraunketa Elkarteak, iaz patrontzan egindako lanagatik. "Orain aurrera begiratzeko momentua da, eta pausoak ematen ari gara, aurten iaz bezain lehiakorrak eta, ahal bada, hobeak, izateko helburuarekin", adierazi du klubak, ohar bidez.