Datozen hamar urteetarako euskara plana egin nahi du Orioko Udalak, eta horren edukia lantzeko helburuarekin, hausnarketa prozesua abiatu du. Oriotarrei eskatu die beren buruei galdetzeko euskararen alorrean zer nahi duten, eta zer egin daitekeen hori lortzeko.
Gogoeta prozesua ahalik eta zabalena izan dadin, lau lantalde osatuko ditu udaleko Euskara Batzordeak: kirola, hezkuntza, merkataritza eta sentsibilizazioa. Alor bakoitzeko herriko eragileak gonbidatuko dituzte, baina saioak irekiak izango dira, edonork parte hartu ahal izan dezan. Urrian hasi eta urtarrilean amaituko da prozesua.
Lehen bileran egoeraren diagnostikoa egingo dute, ahulguneak eta indarguneak nabarmenduz. Bigarrengoan, diagnostikoa azaldu ondoren, hamar urterako helburuak finkatu eta helburu horiek lortzeko ekintzak proposatuko dituzte, eta azkenik, hirugarrengoan, lantaldeak egindako lanaren emaitza aurkeztu, findu eta osatuko dute. Azken bilera ireki bat ere egingo dute, herritarrei egindako lanaren berri eman eta ekarpen gehiago jasotzeko.
Kirolen lantaldea izango da abiatzen lehena. Urriaren 19an, asteartean, egingo dute lehen bilera, alor horretan euskarak dituen ahulguneak eta indarguneak identifikatu, eta diagnostiko konpartitua egiteko. Salatxo aretoan izango da, 18:30ean. Kirol elkarteak eta kirolaren bueltako eragileak bileran parte hartzera deitu ditu udalak.