Lehengo igandean Santurtzin jokatu zuten estropada Eusko Label ligako txalupek, eta jardunaldiak zeresana ematen jarraitzen du oraindik ere. Izan ere, lehiaketaren egunean bertan, asko izan ziren uretako epailearen jokaera ezbaian jarri zuten ahotsak, estropaden historian sekulan hartu ez den erabaki baten harira: Oriori ez zion Hondarribiaren uberan sartzen utzi, tarte zabalarekin atzetik joan arren. Epailearen ontzia Hondarribiaren atzean jarri zen, Oriori istriborrerako bidea itxiz, eta horrez gain, banderatxo urdina atera zien oriotarrei.
Orain jakin denez, Donostiarra Kaiarriba Arraun Elkarteak estropada inpugnatu du, jardunaldiko aktak epaileak Oriori ateratako banderatxoaren berri ez duela ematen argudiatuz. Inpugnazioak aurrera egiten badu, Oriori hiru segundoko zigorra ezarriko diote, eta sailkapen orokorrean puntu bat galduko luke. Hala, Donostiarra eta bien arteko aldea puntu bakarreko izango litzateke, Ohorezko txandan egoteko duten borroka are gehiago estutuz.
Lehiaketako epaile bakarrak onartu egin du Donostiarraren erreklamazioa aztertzea. Hala ere, oraindik ikusteko dago Oriori zigorra aplikatuko dioten edo ez.
