Zierbenan aritu dira gaurkoan Euskotren ligako taldeak. Edinor Bandera izan da jokoan, eta etxera ekarriko du aurtengoa Orio Arraunketa Elkarteak: hirugarren kaletik joanda eta 10:50,24 denbora eginda, Orioko neskek irabazi dute gaurko estropada. Urduritasuna izan da nagusi azken unera arte; izan ere, pare-parean joan dira Orio, Donostiarra eta Arraun Lagunak. Azkenerako, ia elkarrekin iritsi dira helmugara hiru taldeak, baina Orio izan da azkarrena. Dena den, segundo bakarreko aldea atera dio Donostiarrari, eta 4 segundokoa Arraun Lagunaki. Hondarribia, aldiz, Orio baino 11 segundo beranduago helmugaratu da.
Gaurko garaipenarekin 4 puntu eskuratuta, Euskotren ligako aurreneko postua lortu dute oriotarrek. 13 puntu dituzte oraingoz, eta puntu kopuru berdinarekin, bigarren postuan dago Arraun Lagunak. Donostiarra, aldiz, hirugarrena da 9 punturekin, eta laugarrena da Hondarribia, 5 punturekin. Momentuz, lehia dezente berdinduta dago Euskotren ligan.
Gaurkoan, taldekide guztien lanaz gain, Xanti Zabaleta entrenatzaileak eta Rafa Gonzalez de Txabarri prestatzaileak egiten duten lana ere azpimarratu du OAEk.
Atzo, uztailaren 10ean, Donostian izan zuten estropada emakumezkoen lehenengo ligako lau taldeek. Arraun lagunak izan zen garaile Kontxako uretan, eta bigarren egin zuen Oriok.
Estropadako sailkapena
| 3 | ORIO ORIALKI | 05:35 | 10:49,66 | 1 | ||
| 2 | DONOSTIARRA LACTURALE | 05:33 | 10:50,20 | 2 | ||
| 4 | DONOSTIA ARRAUN LAGUNAK | 05:33 | 10:53,78 | 3 | ||
| 1 | HONDARRIBIA BERTAKO IGOGAILUAK | 05:37 | 11:01,04 | 4 |
Sailkapen orokorra
| 1 | ORIO ORIALKI | 13 |
|---|---|---|
| 2 | DONOSTIA ARRAUN LAGUNAK | 13 |
| 3 | DONOSTIARRA LACTURALE | 9 |
| 4 | HONDARRIBIA BERTAKO IGOGAILUAK | 5 |
