Orioko Udalak jakitera eman duenez, Oribarzarko hondartza ez dago bainurako baimendutako Gipuzkoako hondartzen artean, "hango uraren kalitatea txarra izaten delako, batez ere marea behean dagoenean". Hori dela eta, hondartzan ez da sorosle-zerbitzurik, eta udalaren esanetan, ezin da bermatu erabiltzaileen segurtasuna.
Ondotik pasatzen den errepidea ere izan dute hizpide: "Oso egoera txarrean dago, eta arriskua dago zati batzuk hondartza gainera erortzeko. Hori dela-eta, udalak hesituta dauka Oribarzarko hondartza, eta arriskuaz ohartzen duten seinaleak jarri ditu".
Gipuzkoako jende askok du Oribarzar hondartzara joateko ohitura, eta udalaren iritziz, han aforoa kontrolatzeko sistemarik ez dagoenez, eta osasun krisiaren testuingurua kontuan izanik, jende-pilaketak eta egoera arriskutsuak sortu daitezke.
Orioko Udalak aho batez erabaki du aurten ere hondartza ixteko erabakia, "gai horretan eskumena duten erakundeekin gaia aztertu eta gero".