Koronabirusak sortutako osasun krisia dela eta, aurtengo San Pedro jaiak bertan behera uztea erabaki du Orioko Udalak. Xabier Ibarguren Festa batzordeburuak azaldu duenez, "desiratzen" daude festak berriro antolatzeko eta kaleak festa-giroz betetzeko, baina egoerak oraindik ez du aukerarik ematen jaiak "normaltasun minimo batez" ospatzeko.
Sanpedroak antolatzeko aurreikusita zuten dirua kultur programa "indartsu" bat prestatzeko erabiliko du udalak, jakitera eman dutenez. Aurtengoa "kultur ekitaldiz betetako uda" izango dela ere adierazi dute.
Bestalde, Bisiguaren Festa bertan behera uztea erabaki du udalak, 3-4 eguneko "ospakizun handia" segurtasunez antolatzeko bermerik ez dagoela iritzita.
San Joan Berde gauari dagokionez ordea, udalak baimena eman dio Harribil dantza taldeari urtero egin ohi duten ospakizuna egiteko. Gaur gaurkoz, lotzeko dituzte ekitaldiaren inguruko zehaztasunak.