Realak helburua betetzea lortu du ligako azken partidan, Europa ligarako sailkapena lortu eta gero. Txuri-urdinek 0-1 irabazi dute Osasunaren aurkako partida, Alexander Isakek 86. minutuan sartu duen golari esker.
Imanol Alguacilen gidaritzapean, donostiarrek bosgarren postuan itxi dute liga. Entrenatzaile oriotarrak partidaren ostean azaldu duenez, "ikaragarria" da taldea lortzen ari dena. Jokalariak ere pozik agertu dira partidaren ostean, eta Mikel Oiarzabalek denboraldia "historikoa" izan dela adierazi du.