SARA LOIDI - Sofbol jokalaria
Noiz hasi zinen softbolean jokatzen?
Lehen Hezkuntzako 5. mailan hasi nintzen softbolean jokatzen. Lagun batek proposatu zidan probatzea eta, hasiera batean, ondo pasatzeko asmoz joaten nintzen, giro ederra izaten genuelako entrenamenduetan. Pixkanaka kirola ikasten joan gara, eta azken urtean serioago entrenatzen hasi gara.
Zer moduzko esperientzia izan da Espainiako Ohorezko Softbol Ligan debuta egitea?
Oso gustura gaude. Taldeak oso ondo hartu gaitu, eta ikasteko eta hobetzeko prest gaude. Egia esan, kirolari bezala hazteko aukera bikaina da maila horretan jokatzea. Gainera, taldekideak erakusteko gogoz daude, eta eskertzen diegu ahalegina.
Partidak gogorrak izaten al dira?
Aurkarien maila oso altua da, eta antzematen da eskarmentu handiko jokalariak direla gehienak. Aurreko urteetan talde nagusiaren partidak ikustera joaten ginen, baina oso bestelakoa da zelaian egotea eta partidan parte hartzea. Orain arte, esaterako, gure adinekoen aurka jokatu izan dugu beti, baina orain gu baino askoz esperientzia gehiago duten jokalarien aurka aritzen gara, eta horrek beldur pixka bat ematen du hasieran. Entrenatzaileak gutako norbait zelaira ateratzen duenean, ordea, taldearen babesa sentitzen dugu. Badakigu taldea ondoan dugula, beti animatzen aritzen baitira. Huts egiteko beldurra ere izaten dugu batzuetan, baina hori gertatzen bada, oraindik eta ozenago animatzen gaituzte, kale eginez gero ezer ez dela gertatzen adieraziz.
Kirol arloaz gain, bidaiatzeko aukera ere baduzu ohorezko mailan jokatuta. Zer moduzkoa da nagusiagoekin elkarbizitza bidaia horietan?
Oso aberasgarria da guretzat. Esperientzia handiko jokalariak dira gure taldekideak eta beti laguntzeko prest egoten dira. Gainera, bidaiatzeak balio du elkar hobeto ezagutzeko eta talde izaera sendotzeko ere; ederki pasatzen dugu elkarrekin. Ni neu oso gustura nago, eta softbolean jarraitu nahi nuke etorkizunean ere.
