OBBk ligako bosgarren jardunaldia jokatu zuen Mendibeltzen asteburu honetan. Ohi bezala, jardunaldiak bi partida izan zituen, eta oriotarrek biak galdu zituzten Sant Boi taldearen aurka.
Aurreneko partida nagusitasunez irabazi zuten kataluniarrek, eta 3-15 emaitzarekin bukatu zen. Aipatzekoa Amaia Larraza pilota jaurtitzailearen lana; berak egin zituen aurreneko lau jaurtiketak, eta aurkariei ez zien utzi markagailuan aldentzen.
Eten txikiaren ondoren, bigarren partidari ekin zioten bi taldeek. Aurreneko minutuetan Sant Boik aurrea hartu zuen, baina oriotarrek azkar erreakzionatu zuten Maialen Pisonen korrikaldi ikusgarriari esker. Hurrengo txandan, ordea, OBBkoek akatsak egin zituzten, eta bisitariek horiek aprobetxatuz aurrea hartu zuten, 4 puntu aurretik jartzeraino. Partida amaieran, 1-8 izan zen emaitza.
Datorren asteburuan Madrilera bidaiatuko dute oriotarrek, Dridma taldearen aurka indarrak neurtzeko.