Pentsamendu Tailerrak martxa hartu zuen berriro ostiralean, izurritearen ondorioz etena egin eta gero. Etxeluze Gaztetxean hamar lagun inguru juntatu zen arratsaldean, arrisku natural eta teknologikoen gaineko hausnarketa saioa egiteko asmoarekin. Aritz Pardina da egitasmoaren arduraduna, eta tailerraren "balorazio ona" egin du: "Hizpide izan genuen gaia oso espezifikoa dela kontuan hartuz gero, gaztetxera hurreratu zirenek interes handia agertu zuten, eta galderaren bat edo beste egitera ere ausartu zen inor".
Pardinak nabarmendu duenez, kontzientziazio dinamikak piztea du helburutzat Pentsamendu Tailerra egitasmoak, eta xede hori beteta geratu zen ostiralean. Hilaren 26an izango dute hurrengo zita, emozioen lanketa ardatz hartuta.