Haatik dantza talde euskaldunak dantza eta bertsoak uztartzen dituen Errimak bi oinetan emanaldia eskainiko du urriaren 30ean. Karela kiroldegian izango da erakustaldia, eta aldez aurretik erosi beharko dira sarrerak, Kultur Etxean eta 5 euroren truke. Jada salgai daude, pertsona bakoitzak gehienez bi sarrera eskuratu ahalko ditu.
Hain zuzen ere, Aiert Beobidek zuzendutako taldeak "bertsoen laguntzaz" osatu nahi izan du ikuskizuna, sormenerako "lurralde berriak esploratzeko". Ordubetez irauten duen ikuskizun honek, beraz, dantzaz gain, gaur egungo eta garai bateko bertsoak plazaratzea du helburu.