Larrialdi egoerari, tamainako erantzuna lematzat hartuta, "janari bilketa erraldoia" antolatu du Zaporeak Gobernuz Kanpoko Erakundeak, Moriako kanpalekuetako pertsona errefuxiatuei laguntzeko. Hala, ostiral eta larunbat honetan, irailak 25 eta 26, Hego Euskal Herri osoan zehar batuko dituzte elikagaiak Zaporeakeko kideek.
Orion ere jarriko dute biltze puntu bat, hain zuzen, herriko plazan. Ostiralean 17:00etatik 19:30era eta larunbatean 10:00etatik 13:00etara izango da martxan bilketa.
Ondorengo elikagaiak eramateko deia egin die herritarrei Zaporeak erakundeak:
- Arroz luzea
- Garbantzuak
- Dilistak
- Babarrunak
- Makarroiak
- Atuna eta sardinak latan
- Oliba olioa
- Espeziak (kominoa, currya, piperbeltza eta piperbeltz zuria)
- Esne hautsa
- Barra energetikoak