5.000 biztanletik gorako herrietan kalera ateratzeko ordutegiak zehaztu ditu Espainiako Gobernuak, adin tartearen arabera. Dena dela, dekretuan azaldu dute herri txikietan 06:00etatik 23:00etara bitartean atera ahalko direla herritarrak paseatzera eta kirola egitera. Hala, aiarrek ordutegi zabala izango dute kalera ateratzeko, baina hainbat arau bete beharko dituzte.
Alde batetik, 14 urtetik gorakoek kirola egiteko bakarka atera beharko dute kalera, eta norbera bizi den udalerriko mugen barruan ibili beharko dute. Egunean behin egin ahal izango da kirola, baina umeak dituztenak haiekin ere kalera atera ahal izango dute egunean beste behin, ez dago aukeratu beharrik bat edo beste. Haurrekin kalera ateratzeko ordutegi zabala izango dute aiarrek, baina umeek heldu batekin atera beharko dute, eta etxetik kilometro bateko erradioan ibiliko dira.
Bestetik, paseatzera etxeko bizikide batekin atera ahalko dute kalera, eta etxetik kilometro bateko erradioan mugitu beharko dute.
Horrez gain, ezinduak, 70 urtez gorakoak eta elbarritasunen bat edo behar bereziren bat dutenak laguntzaile batekin edo bizikiderekin batekin atera ahalko dira kalera.
Azkenik, Espainiako Gobernuaren dekretuan argitu dute ezingo direla kalera atera COVID-19arekin gaixotuta daudenak, berrogeialdian daudenak, eta zahar etxeetako egoiliarrak..