Iragan ostiralean, irailak 27, izan zen Xua gurasoekin etxera kantuaren aurkezpena, hileko azken ostiraleko elkarretaratzearen ostean. Herritar ugari bildu zen Orioko plazan, Patxi Uranga preso oriotarra eta haren bikote Olatz Lasagabasterra presoa aske utzi ditzaten eskatzeko. Izan ere, urtarrilean beteko ditu hiru urte haien alaba Xuak, eta legearen arabera, ezingo du gurasoekin espetxean bizitzen jarraitu. Hala, Usurbilera ekarriko dute. Horren harira sortu dute Xua gurasoekin etxera herri dinamika, gurasoak alabarekin batera etxera etor daitezen eskatzeko.
Abestiaren aurkezpenarekin batera abiatu zuten sinadura bilketa. Horretarako mahaia jarri zuten plazan, baina Internet bidez egiteko aukera ere izango da hemendik aurrera, change.org webgunean.
